最近收到好多媽媽的DM
大家非常用心打好多字同我分享你哋嘅心情同經歷
我覺得「媽媽」呢個身份其實某程度好孤獨
好多時老公未必體諒你，奶奶未必理解你，仔女未必聽你話等
呢個身份好多時都會有孤身作戰嘅感覺
媽媽們，你哋有幾耐冇「Me Time」過？
曾經我覺得拋低仔女出去係自私的行為
於是乎我仔仔出世後就開展我嘅困獸鬥式的育兒生涯
我已經唔記得我幾耐無同朋友出街
難聽啲講句，我連去廁所都有人望住
直到有一日我忍唔住困住自己係房喊
我個仔係我房門外面不停大叫搵媽媽
果一刻我發現原來我嘅愛同付出方式並非最理想
事實上「自私」一點其實並不自私
無論愛情上、親情上、友情上⋯⋯
一個人要自愛，令自己開心，先可以令身邊嘅人開心
當然前提係喺唔傷害人嘅情況下去適當地滿足自己
當你以為24小時奉獻哂俾屋企代表「責任心」
但因為長期抑壓而心情煩躁，漸漸對家人失去耐性和溫柔
咁樣真係「盡責」的表現嗎？
氣球充太多氣會爆，媽媽嘅情緒都一樣
當身心俱疲時應該抖吓氣，叉吓電再照顧身邊人
當你有好心情，你身邊嘅人都會被你嘅開心感染
要記住，如果你連自己都照顧唔好自己，點去照顧好人哋？
不過，講真係好易，實行真係好難
我明
「唉，搵鬼幫我湊仔咩？邊有時間出去。」
「我出咗去好唔放心，最後又趕返屋企。」
現實中真係好多因素去令你卻步
好似我咁
我好想擁有自己嘅事業
但我總係唔捨得將時間留點俾自己
其實好多嘢我都唔知點開始
萬事一定起頭難，又怕自己有頭威冇尾勢
我想改變現狀！
而改變現狀，就要由改變心態開始
最後，好想多謝媽媽們的Message
你哋並不孤單
「媽媽」呢個角色真係唔容易
我哋一齊成長、一齊進步😘
我今日玩得好開心
希望你哋都可以🥰
12:19 am
Search